Während mier Meitli une gwarted hend hend sie s nöd chöne si lah z versueche ufezchlättere

Es isch liecht chüel gsi aber t olivia het numme wege 10 sekunde de Schuelrekord nöd broche

Das isch no so en See aber ich han s leider nöd chöne bruche für Nature Photography wills meh Landscape isch…

Also das isch mis eine Bild für Nature Photography gsi

Und das isch na s andere gsi

Ja ich lebe no

Ja ich lebe no

Also zersch emale es tuet mer leid, dass es so lang duret het bis ich da wider eppis neues druf ta han, aber ich han eifach mega viel um t Ohre gha und mengisch halt au eifach kei Motivation zum eppis schriibe. Für die wo s nonig wüssed ich han t Gastfamilie gwechslet. Ich lebe also momentan bi mim Coach und sinere Familie (die hend 4 Chind vo dene isch aber nume die jüngsti nonig am college), aber das isch nonig definitiv ob ich bis am Schluss da bliibe wird. Aber es gfallt mier mega bi dere Familie, sie sin mega nett und ich fühle mich mega wohl.

Ih de Schuel laufts sowiet eigentlich guet, mini Notene sind au ziemlich guet. Weight lifting mach mer immerna mega spass, obwohl ich han letzt wuche ferie gha und denn han ich halt eh wuche lang keini vo dene Üebige gmacht und ich han demnach die wuche voll muskelkater ih de Bei gha und es het richtig weh ta am morge ufzstah. Ih minere gschichtsklass gahts eigentlich au guet numme dass de Lehrer nöd eh so oft Husufgabe git, was ja eigentlich guet isch, aber wenn er denn Husufgabe git isches so richtig viel und denn stricht er mengisch es spaar sache für eus ustuschschüeler, aber es isch halt amel trotzdem na mega viel und denn bin ich mengisch so verwirrt vo dem alte englisch das halt mengisch ih Quellene bruchet wird, dass ich denn amel eifach irgendeppis aneschriibe und mier denn denke er wirds scho merke, dass ich s falsch verstande han falls es falsch isch aber ja. Ih Photography hemmer grad s Thema Nature Photography gha und mini zwei Bilder werded entweder bevor oder nach dem Text irgendwo z finde si, allgemein muen ich sege, dass ich voll de fan vo Photoshop bin will au wenn mer nöd eh so en profi isch wie mis Mami chammer mega viel us nem Bild usehole wenn mer scho numme t Konträst echli verstärkt oder so. Mini englisch Klass find ich immerno voll langwiilig und es überchunt mich eifach immer so eh müedigkeit ich dere Lektion. Am Dunnstig vor de Ferie bin ich sogar tatsächlich voll ihgschlafe also nöd numme so ihdöset sondern richtig ihgschlafe und als ich ufgwache bin isch sie mich voll am ahstarre gsi und ich han t Helfti vo dem was mer als uftrag becho hend nöd mitbecho ich bin denn aber schnell wieder drus cho. Ja das het eigentlich numme so echli sölle am Rand stah damit iher eu vorstelle chönd wie langwiilig es isch… Spanisch lauft eigentlich au alles guet und ih interior design han ich en chössibezug gnäht und will ich de Stoff falsch gschnitte han und s demnach echli z gross gsi isch han ich halt bim verschluss na chnöpf ahgnäht, dass mers meh zuemache chan und s nöd eh so uffallt, dass ich en fehler gmacht han und denn han ich sogar na extra credit für die Chnöpf und t Chnoplöcher becho will das eher eppis fortgeschriteneriges isch und ich han kei abzug becho wege de grössi. J Jetzt hemmer s Thema Farbene und will ich deheime Musig und need Bildnerisches Gestalte gno han und ich allgemein nöd eh so druschume mit farbene han ich mier überleit ob es echtsch scho zu spaat isch z behaupte ich segi uf irgend eh art echli farbeblind oder so aber ja.

Ja also falls mich jetzt öpper frögt haha du bisch so gross spielsch du basketball? Wird ich immerna sege Nei. Ich bin zwar vom Mäntig bis am Mittwuch ah de tryouts gsi, es isch mer allerdings scho nach weniger als 20 minute klar gsi, dass es schwierig werde wird. Die Mädels sind wahrschinlich all mit nem Basketball ich de Hand gebore oder so. S ufwärme isch ja no gange und mit de guete Hand de Bölle während em renne prelle isch au na voll easy gsi, aber hesch schomal versuecht de Bölle zwüsched dine Bei dure z prelle und uf de andere siite wieder z fange und das ganze während mer rennt? Oder hinter em rugge dure und mit links wieder uffange und wiiter prelle? Und das alles während dem ich versueche nöd über mini eigene Füess oder de Bölle z stolppere. Denn han ich ja eigentlich gmeint gha mis englisch segi mittlerwiile ziemlich guet aber defense und ofense usenand z halt isch wie es chliises chind wo versuecht links und rechts z verstah. Und was bitte schön isch en outlet im Basketball??? Ich han emale nöd ahgno dass es sich um eh steckdose handlet. Und ja ich bin viellicht gross, aber au extra unfähig, obwohl de ziestig eigentlich nöd eh so schlecht gloffe isch, am mittwuch hemmer denn hauptsächlich na gspielt gha und ih dene 3 minute wo ich uf em Feld gsi bin han ich s doch tatsächlich gschafft en super schöne Pass NÖD z fange. Also hends denn am schluss eini nach de andere zu ihne is Büro grüeft und eim gseit ob mer im Team isch oder nöd und nachdem sie einere die au eher gross isch und definitiv besser gspielt het als ich nei gseit hend han ich zu 120% gwüsst gha dass ich s nöd gschafft han, aber ich meine ich hans versuecht und ich weiss genau, dass ich s bereut hetti wenn ich s nöd versuecht hetti. Aber ja demnach bin ich denn am Dunnstig wieder zrugg im Cross Country practice gsi und ich han mich irgendwie mega gfreut gha wieder deete z si und jetzt wird ich im Winter vermuetlich „winter warriors“ mache, also eifach wiiterhin cross county also eifach trainiere aber kei meets. Meistens mached das halt die wo eifach zwüsched de cross country und de track season wend in form bliibe und denn chan ich denn au grad scho im februar mit track ahfange. Am Mittwuch abig bin ich denn na mit nem Kolleg ih sini Chile gange also es isch so eh youth group gsi und es isch mega lässig gsi aber die type deete sind eifach so begeisteret vo waffene gsi. Ich weiss jetzt dass mer da Eichhörnli jage tuet und dass mer die sogar esse chan, mer chan sie sogar mit nere „bb gun“ schüsse chan (frög mich nöd was das isch ich bin nämlich au nöd drus cho), reh jage seg angeblich ziemlich frustrierend will die so schnell weg renned falls sie überhaupt füre chömed und mit Pfiil und Boge segs sogar na müehsamer aber ja ich würd mal sege willkome in amerika.

Am Samstig morge gömmer denn na mit em Cross Country team at Semi-States was wahrschinlich no s letzte renne sie wird für euses Team will s ziemlich schwierig isch s zu de States z schaffe, aber ich muen ja eh nümme renne am meet selber, will ich nöd zu de top 7 ghöre, aber mier gönd halt trotzdem alli no mit. Übrigens isch es da uf eimal so a….chalt worde ungefähr vom eine uf de anderi Tag vo 25°C zu 0°C aber hey uf das isch t antwort au ganz eifach: willkome in indiana.

Vom Powder Puff Game (ich han ehrlich gseit kei Ahnig vo de Regle gha)

NEW PERSONAL RECORD! ca.23 min 25 sek für 5k ich han die genaui Ziit nonig und das isch t Olivia uf em Föteli, nebe ihre fühl ich mich gar nöd so gross

Mis eine Bild für t Photography class

Und s andere Bild

Es isch schwieriger is Boot inezcho als mer denkt

Ich bin nöd is Wasser gheit yesss

Mini Sexy Gummistiefel

S eine Bild Für Landschaftsphotographie

Das het am Lehrer so get gfalle gha ich persönlich finde s andere besser

Es isch scho September

Also es tuet mer leid, dass de Bericht ersch jetzt chunt, aber ich han halt eifach viel los gha. Also ih de Schuel laufts eigentlich mega guet und ich han eigentlich t Fächer voll gern, aber t englisch Lektion isch eifach immer voll langwiilig. Defür nännt mich jetzt de weight lifting coach Leonie und er sprichts sogar na ziemlich richtig us. Letztes Wucheend simmer na gange go Campe will de Mäntig labor day und so mit en Schuel freie Tag gsi isch. Mier hend euses Zelt grad am See gha und das isch eigentlich mega schön gsi, mier sind na gange go Kajak fahre was au mega Spass gmacht het und ihre Brüeder und dem sini Familie isch no debi gsi, die hend ihre Wohnwage und ihri zwei Hünd mitbracht gha und denn isch na es anderes Ehepaar mitcho die au en Wohnwage gha hend und ihri drü Dackel (ich glaube es sind Dackel gsi) mitbracht hend und die hend mich so ah das Ehepaar us em Film Jagdtfieber erinneret. Eigentlich hets mer voll gfalle, aber im Zelt schlafe isch irgendwie eifach nöd eh so miis. Also han ich denn am Mäntig au kei Cross Country practice gha und denn bin ich eifach na mit de Kate gange go Jogge und will das da als viel zu gföhrlich ahgseh wird simmer eifach vo minere Gastmuetter ihrem Huus zu ihrem Huus und wieder zrugg grennt und das sin denn ungefähr so zwei Meile gsi. Ich han die Wuche au na mini Landschaftsfotene für min Photographiekurs abgeh und sogar es A+ becho und er her sogar gmeint ich sölli das eine Bild ah die lokali Ziitig schicke. T Olivia us em Cross Country Team het sich mega gfreut, dass ich ah t Basketball try out gah wird au wenn ich mier nöd so sicher bin ob eifach gross si gnueg isch J und ich weiss au gar nonig so genau wenn das si wird. Am Dunnstig hets denn ahgfange regne und am Friitig abig während em Football game hets au die ganzi ziit gregnet. Aber devor simmer na ah nere „Pasta Party“ gsi, mengisch organisiert irgndöper us em CC Team so öppis ih dere art am Abig vor nem Lauf, allerdings isch de Lauf denn am Samstig doch na abgseit worde, will s döte wo s gsi wär am blitze und rägne gsi isch. Eigentlich het mis Gastmami na Charte für es Konzert am Samstig abig gha, aber das isch denn au abgseit worde wills dusse gsi wär und s immerna am regne gsi isch. Also simmer mit ihrere Schwöster und dere ihrne Chind na ih es Restaurant gange und uf em Heiweg simmer na gange go Gummistiefel chaufe und will ich für Amerika so eh durchschnittlichi Schuehgrössi han hets nur no eis Paar ih minere Grössi gha und das sind gelbi mit Hüehner drufe gsi. Sie stönd jetzt ich mim Chleiderschrank ich bin also gwappnet für de Rege. Es isch mengisch voll lustig was für Frage mier gstellt werded zum Biespiel wieso ich mini Spaghettis so lustig uf mim Löffel ufdrehe tuen oder mis Gastmami isch gfröget worde ob ich „swiss“ rede tuen oder „wieso chasch du dütsch ich han gmeint du bisch us de Schwiz“ und sönigi Sache… Mini shin splints sind wieder besser und ich bin bim letzte Lauf scho um eh Minute schneller gsi als bi dem devor, ich bin allerdings überzügt, dass ich mich immerno verbessere chan und villicht chan ich nöchste Samstig sogar für Varsity renne (also ih de bessere Gruppe).

Also jetzt am nöchste Mittwuch wird ich no mini Fotene zum Thema structure/architecture abgeh müesse und denn am Abig gömmer denn na ah das Konzert vom Samstig, will eigentlich isches nöd abgseit sondern eifach verschobe worde. Und ja denn han ich am Samstig morge wieder en Lauf.

Ich wünsche eu allne ganz en guete Start it Wuche!

Leonie

Cross Country

Am Mittwuch han ich min erste Lauf gha und zwar han ich die zweite 2.5km müesse renne. De ganz Tag lang hets immer wieder gheisse gha, dass es viellicht abgseit wird, will es Gwitter ahgseit segi. Es het denn aber zum Glück doch stattgfunde, es isch halt eifach alles nass gsi, wills de ganz Tag lang gregnet gha het, aber mier sind ahcho und es isch zumindest vo obe her troche gsi. Mier sind übrigens mit nem Schuelbus gfahre und ich han mich eigentlich voll druf gfreut gha mit somene Bus z fahre, aber mis Fazit: es isch sehr eng wemmer langi Bei het. Und damit mein ich nöd eifach, dass mer vorne ahchunnt, damit meine ich, dass es schlichtwegs eifach gar kei Platz het zum normal da z sitze, aber t Fahrt isch nöd so lang gsi. Mier sind denn en Teil vo de Strecki abgloffe und ich bin mega nervös gsi, ich han ja kei Ahnig gha wie dass en Lauf da so ablauft und t Strecki isch au nöd irgendwie gross abgsteckt gsi. Uf jedefall sind denn die erste Läuferinne gstarted und denn wo die erste paar denn scho langsam wieder zrugg cho sind hets denn eifach uf eimal so voll ahgfange z regne und denn isch die mit dere ich im Team gsi bin zrugg cho und ich bin im strömende Rege losgrennt und denn isch zersch de ersti Teil vo de Rundi uf de Wiese gsi und de zweiti Teil isch durch de Wald gange. Und chum bin ich im Wald und zumindest echli im Schutz unter de Bäum hets ufghört z regne. Allgemein isch uf de ganze Strecki immer wieder öppert gstande und het eine ahgführet was mega motivierend gsi isch numme de Coach het so voll luut grüeft gha und ich bin so verschrocke, will ich das eifach so voll nöd vo ihm erwarted gha han und er eigentlich sunsch immer so voll en ruhige gsi isch, aber er hets ja eifach guet gmeint gha. Schlussendlich simmer denn 18. worde und als Schuel simmer 3. gsi.

Am Samstig han ich denn scho de zweti Lauf gha, dasmal sinds eifach 4km für jede gsi und Freshmen und Sophomores sind gegenenand grennt und Juniors und Seniors gegenenand. Die Strecki isch „eigentlich“ eifach sehr grob gseit es Oval gsi das mer zweimal het müesse renne und jetzt wieso numme sehr grob: Zersch gahts ganz grad 500m ih die eini Richtig, denn hets eh mega engi fast 180° Kurve und mer rennt 500m wieder zrugg, denn isch mer wieder uf de Höchi vom Start und em Ziil und mer het voll s Gfühl mer hegs jetzt denn grad aber denn gahts eifach na so 1km lang mit so ganz vielne Schlaufene wiiiter und denn hets so en riesige Busch/Baum wo eim t Sicht uf s Ziel versperrt und mer meint denn mer müessi no wiiter renne und denn chunnt mer um de Busch ume und es sind na 50m bis zum Ziel. Es isch demnach en sehr churze Schlusssprint wode, aber s Beste und das het min Tag gmacht, isch gsi mer het es Wasserglace it Hand druckt becho sobal mer im Ziel gsi isch. Ich han eh Ziit vo 20min 36sek gha J womit ich z friede bin, aber s hoffentlich na verbessere chan.

Die ersti ganzi Schuelwuche

Also ich han jetzt die ersti ganzi Schuelwuche hinter mier und es isch mega schnell verbi gange. Ih minere Algebra Klass isches eigentlich voll lässig mier hend grad Funktione und eigentlich han ich das scho gha, aber es isch irgendwie na interessant z ghöre wie die gwüssi Sache nänned oder wie die da anderi Lösigsweg bruched. Denn han ich mich doch no dezue entschiede mini Government Klass no z wechsle und ich bin jetzt mega froh, dass ich das gmacht han, ich han jetzt zu weight lifting gwechslet. De Coach (gseht übrigens sehr so us wie de Diktator vom Film der Diktator) het denn am erste Tag wo ich deete gsi bin t Näme abeglese, ob alli da sind und het denn gfröget ob er vo irgendöperem de Name nöd gseit hegi und denn han ich mich halt gmolde und nacher frögt er so ja wie ich denn heissi und ich halt „Leonie“ und denn luegt er mich so liecht überforderet ah und frögt nachem Nachname und als ich denn Strickler gseit han frögt er ob er mich demfall au eifach Strickler nenne chan. Er nennt mich jetzt Strickler oder zumindest meistens. Ih mine andere Klassene het sich eigentlich nüt gänderet. Ich han ih Introduction to Housing and Interior Design jetzt scho mini ersti Arbeit müesse abgeh und zwar isch das eifach so es Poster gsi wo mer het müesse gestalte und Bilder vo sim Traum Huus vo inne und usse ufchlebe und no echli epis dezue schriibe. Ja das het eigentlich mega Spass gmacht au wenn ich mega lang dra gschaffet han. In Spanisch bin ich am Dunnstig irgendwie so verwirrt gsi, dass als sie gfröget het was de Satz bedüted ich t Antwort uuf Dütsch gseit han, aber das isch s erste Mal gsi, dass mier so eppis passiert isch. Mit mim Gastmami lauft alles guet. Letzte Sunntig simmer na ah nem Baseball Spiel vo ihrem Neffe gsi de isch sechsi und sie hend gege ihri Müettere gspielt. Das isch na mega amüsant gsi und t Müettere hend schlussendlich gwunne, obwohl sie irgendwenn hend müesse ahfange de Schleger mit de schlechtere Hand obe z hebe will sie viel meh Pünkt gha hend. Und ih de Schuel han ich jetzt na en Laptop becho, also alli bechömed eine und mit de chleider fürs weight lifting muen ich jetzt amel am morge immer mega vill mitneh, aber immerhin chan ich das alles ih min Spind tue und ich bin voll stolz uf mich will ich jetzt amel nümme meh als zwei Versüech bruche zum das Drehschloss ufzkriege. Am Friitig abig han ich denn eigetlich na mit de Kate und ihrne Eltere (ihre Brüeder isch im Team) as erste offizielle Football Spiel welle gah, also mier au deete gsi, aber denn hets voll ahgfange z regne und denn als es au na ahgfange het z blitze isches denn unterbroche worde will t Tribüne us Metall sind. Spöter hends denn wiiter gspielt gha, aber mier sind denn scho uf em Heiweg gsi und es hett denn eh na de ganzi Abig lang gregnet gha

Die erste paar Schueltäg

So ich han jetzt die erste drü Schueltäg scho hinter mier. Und es isch mega guet gloffe.
Also zersch emale han ich torch time gha (numme am Mittwuch) wo mer grundsätzlich eifach es paar Informatione bechunt. Denn hemmer müesse is Auditorium gah und deete eifach echli zue lose (ziemlich langwiilig gsi). Und denn han ich ih de erste Lektion de Kurs Algebra 2 honors. Die Lehrerin isch mega nett und obwohl das eigentlich en eher schwierige Kurs isch han ich nöd s Gfühl, dass es zu schwer isch, will s erste wo mier jetzt mached sind Funktione und das han ich eigentlich scho ih de dritte gha. Denn han ich US Government und ich glaube das wird wahrschinlich s schwierigste si, will ich eigentlich eifach kei Ahnig vo dem Thema han. Aber de Lehrer het voll Freud, dass ich als Ustuschschüelerin ich dere Klass bin und er isch mer sehr sympathisch, drum denk ich, dass ich ih dere Klass bliibe wird (ich chönti no bis am Mitwuch wechsle). Ich dere KLass bin ich au die jüngsti, will eigentlich isch de Kurs numme für Seniors, aber irgendwie han ichs trotzdem drigschafft. Denn han ich US History und de Lehrer het eigentlich immer alli Ustuschschüler gern ih sinere Klass und somit simmer jetzt vier (zwei vo Dütschland und eini vo Spanie) Ustuschschüeler ich dere Klass. Es isch na lustig, will mier mached jede Tag so es Quiz, was genau ah dem Tag eifach ich nem andere Jahr passiert isch, also er seit eus immer as passiert isch und mier müend t Jahreszahl rate. Mängisch chömed denn halt eifach so Presidente Näme wo ich kei Ahnig devo han, aber die meiste amerikaner ih dere Klass wüsseds selber au nöd unbedingt… Denn han ich Resource, das isch eigentlich eifach eh Freistund, wo mer mache chan was mer will, mer muess eifach uf em zweite Stock bliibe, also eigentlich isches denkt zum Husufgabe mache, aber ich denke, dass ich so bald t Schuel ah de KZN wieder ahfangt ich eifach echli de Stoff wird ufschaffe. Denn han ich Lunch und ich iss jetzt amel mit welchne vom Cross Country Team. Nach em Mittag han ich Photography und de Lehrer gseht eifach irgendwie voll us wie so en schottische Kobold, numme dass er ziemlich gross isch. Am erste Tag hetter so eh chlini Presentation gmacht gha und am Schluss seit er so ja wahrschinlich hend mier eus ja jetzt scho all gfröget woher er die skinny tie hegi, will das segi ja momentan so voll in Mode und denn heg er halt so eini welle ha für de ersti Schueltag, aber so eini würdi im Lade halt irgendwie so 40 Dollar koste und drum hegi er jetzt de besti life hack für eus und zwar chöni mer sini normali Krawatte eifach verchehrt ume binde und denn de dicki Teil (wo mer normalerwiis gseht) eifach ih sis Hemd inestecke und ich han mich scho die ganzi Lektion lang gfröget gha wieso er eh Krawatte unter sim Hemd treit, will mer halt de dicki Teil vo sinere Krawatte duregseh het und drum empfinde ich das als en nöd so guete life hack, aber ich han ihm das nöd gseit, will er het so freud ah sinere geniale Idee gha. Ja denn han ich Englisch und ich han nöd s Gfühl, dass ich da goss Schwiergkeite ha wird, will die het eifach zu allne so mega übertriebe dütlich und langsam gredet, als hettemer na nie englisch ghört. Nach Englisch han ich Spanisch und es isch mier eifach ersch da ufgfalle, dass ich halt voll de spanischi Akzent han will mier halt das spanische Spanisch ich de Schuel lerned und t Lehrerin het mier das halt au gseit und denn han ich halt denkt, dass die da halt eifach en mexikanische Akzent hend, aber die hend eifach so voll de englischi Akzent und das isch irgendwie na voll lustig sie seged zum Biespiel „tardes“ wie „tar-days“, aber ja die Lehrerin und die Klass isch mega lässig und es macht mega Spass. Nach Spanisch han ich denn eigentlich na s gmüetlichste Fach vom ganze Tag und zwar Introduction to housing and interior design und das isch zemme mit fashion, also werdemer hauptsächlich nähe und bastle.  Nach de Schuel han ich denn amel jede Tag na Cross Country Practice und das gfallt mer voll. Es isch zwar richtig warm und es sind halt Distanzene um 5km ume (also ah de Läuf wird’s praktisch immer eifach 5km si), aber es isch so motivierend ih nere Gruppe z renne und jetzt wird ich am Mitwuch de ersti Lauf ha, aber de isch eine vo dene Usnahmene, also  öppert rennt eifach die erste 2.5km und öper anderes die zweite 2.5km. Will mer allerdings 10 Trainings muess ha bevor mer an erste Lauf chan gah han ich am Samstigmorge numal chöne gah und ich wird am Mäntig vor de Schuel numale gah müesse. Mer merkt da iregndwie eifach mega, dass Sortler mega ahgseh und halt au Rücksicht uf sie gno wird, will praktisch jede Lehrer het gseit, dass sie nöd eh so viel Husufgabe gebed, will sie findet mier sölled nach em Training nöd no meh für t Schuel mache müesse oder dass es nöd eh so schlimm isch falls mier t Huusufgabe nöd gmacht hend will mier irgend es Spiel oder en Lauf oder so gha hend.

Letzte Tag vor em Schulahfang

Das isch wohl min letzte Tag vo mine ach so lange Summerferie gsi. Zersch hemmer mich müesse ihträge ah de Schuel, zum das mache hemmer scho gester Abig so es paar Bletter usgfüllt. Allerdings isch das voll unnötig gsi will schlussendlich het de Typ eifach das Zügs wieder ich sin Laptop abtippt und mini Gastmuetter und ich sind eifach numme so denebed gsesse. Denn simmer is nöchste Büro gschickt worde, wo mer eigentlich eifach nurno es anderes Blatt hend müesse entgegeneh und die Frau hets mega interessant gfunde, dass ich vo de Schwiiz chume, zwar isch sie no nie deete gsi, aber findet es tönt so interessant. Und denn simmer is Büro cho, wo ich mini Fächer han chöne wähle. Ich bin zwar nöd ganz drus cho was sie zum Teil gmeint he vo wege erstes und zweites Semester, aber ich bin jetzt eigentlich z friede mit mim Stundplan. Ich han jetzt zwar leider nöd ih s Orchester chöne will die das irgendwie zemmergleit hend mit de marching band, aber die treffed sich nach de Schuel und da han ich eigentlich vorgha zum cross country practice z gah, drum han ich s denn eifach sii lah. Denn simmern no zum athletics office gange, das so ziemlich im hinterste Ecke vo de Schuel isch. Uf jede Fall hend die denn deete gmeint, dass ich eigentlich besser Volleyball spiele söt mit minere grössi, aber ich glaub das isch jetzt eifach mal definitiv nüt für mich. Und deete hemmer denn no meh Bletter becho zum Usfülle.
Wo mer denn am Zmittag esse gsi sind het eus denn die Frau vom Büro mit de Fächer ahglüte und gseit, dass sie eus die falschi Ziit geh het für t Führig durch t Schuel, dass die also eigentlich scho ahgfange het. Und obwohl ich schlussendlich zu spaat deete gsi bin het mier denn eini elleige zeigt, wo dass mini Zimmer sind und so. Sie het mier denn au na min Spind zeiget und wie mer ihn ufmacht, aber das Drehzahleschloss isch eifach so nöd mis. Ich schaffs numme öppe so jedes sechste Mal s zöffne. Aber die meiste seged, dass mer de angeblich eh fast nöd brucht. Denn hemmer au na mini Büecher gholt, also eigentlich sinds numme zwei, defür sind die so richtig dick und schwer. Und denn am Nammitag han ich scho chöne zu mim erste cross country training gah. Und denn simmer zersch male 30min dusse gange go renne und es isch eifach sooo warm und mega schwül gsi und ich han au na langi Hose ahgha, aber immerhin sind eifach alli nacher voll verschwitzt gsi. Denn hemmer no echli Sprinttraining gha uf em Grass, will mier ja schlussendlich uf em Grass renned, aber ich muess mich da definitiv no echli dra gwöhne, dass es nöd eh so ebe isch. Alles in allem hets mega Spass gmacht, au wenn s mega ahstrengend gsi isch. Also wird ich jetzt jede Tag Training ha und amel am Samstig morge irgenden Lauf. T Kate isch au eini wo cross country rennt und sie wohnt sogar ah de gliche Strass und so isch sie denn mit eus heigfahre. Und ja so wird morn min erste Schueltag si und ich weiss scho jetzt, dass ich wahrschinlich nöd mini Zimmer finde würd, aber denn frög ich halt eigfach irgendeppert.

1 2